Faschings-Sünd

As Fannerl geht heit auf´n  Boj,

ois Spanierin – und dekolltiert!...

Sie geht des Joahr zum erstn Moj

in dem Kostüm! – Ob des wos wird?

`S is Weiberroas, am Donnasdog!

De Musi spuit – da Danz geht a…

Und Danzn is, wos´s Fannerl mog!

Sie hofft heit auf an scheena Ma…

Iatzt danzt´s  goar mit so am „Senor“

(der muaß vo Andalusien sei!)…

A fescha Bursch – nia g´sehgn davor!

Der hoazt am Fannerl  sauba  ei´!

Sie danzt mit eahm de ganze Zeit

und goar is´s erst so  um´ra  Drei…

As Fannerl gspürt zu ihra Freid:

Des könnt da Ma fürs Le(b)m iatzt sei`!

Er bringst`s  aa hoam! -“Kimmst no mit rauf!?“

Den mecht´s heit ham – des woaß genau!

Und - wia ´sn  ausziagt, kimmt se drauf:

- Da fesche Spanier  is - a Frau!

                                                                    P.U.  19.02.07