Klappstuhl Regenschirm-Pfeife

Im Katalog schreibm´s, des waar guad:

A so a Klappstui – Regnschirm - Pfeif!

Hob ned gwußt, wos ma damit duad;

Hob´s  durchglesn, dass i `s  begreif´:

Hast´ irgendwo koa  G´legnheit

zum Sitzn, nachad klappst as auf…

Da beste Sitz is`s – weit und breit,

und ganz bequem sitzt ma do drauf!

Ois Schirm konnst as benutzn - und

hast koite Händ, na warmst d´as dra,

weil ma des Ding – `s is´ zwoar ned gsund -

ois Tabakspfeif benutzn  ka…

Des Ding ka  mehra, ois ma denkt:

A Taschnlampn is no  drin,

a Schraubnziaga – ferngelenkt,

zum Musi-Spuin: a Tamburin!

Kondome für an „safen sex“

san im Geheimfach – ned zum glaubm!

Und no dazua - bin ganz perplex -

a Packerl mit Reserveschraubm.

A Kompass und a  Fejdbesteck…

Ma sogt, dass  (koana woaß des gwieß)

sogar a Messer – ja varreck –

und aa  `ra  G´wehr mit ei´baut is!

 Do steht, des waar no  lang ned oiss…

`S is kloa und taugt für Weib und Ma,

weil ma´ des ganze jednfoiss

im Gürtltaschal mit trogn ka…

I  hob ma `s  b´stejt! - Des Packl kimmt…

Hob´s auspackt und glei ausprobiert:

Wos de vasprochn hamm - Des stimmt!

Ja - und da Sitz: klimatisiert!

Iatz hob i hoit des Wunderwerk

und trog des jedn Dog am Bauch…

- Drei Joahr lang scha, ja -  und i merk,

dass i des Ding fast nia ned brauch…

Und gestern redt mi ebba a:

„Des waar a Notfall !“ -  is  sei´ Red;

ob i  eahm  `s  „Handy“  leiha ka?

Des duad ma leid:  - Grod des - konns ned…

                                                               P.U.  08.03.06