Anna Steinacher
Seniornfasching
Oanmol im Johr jo dou geats rund,
die Seniorn kemmen kunterbunt,
unters Johr do löign sie drauf Wert,
dass gonz ordntlich ungizougn wert
obr um Fosching so isches öibm,
sie sich dr Norrnfreiheit hingöibm.
Dr Josef kimb in Minikleid,
die Fini isch a Bauer heit,
dr Paul stolziert als feine Dame,
die Rosa mocht ols Wirt Reklame,
dr Max isch gor a Böisnbinder,
die Sofia trog Frack und Zylinder,
dr Franz hot longa Zöpfe,
die Kathi kimb mit ihra Töpfe,
die Frieda isch a Herr Baron,
die Susi kimb mitn Saxophon,
dr Peter isch a junger Bua,
die Berta gor die lila Kuah,
dr Clown des isch dr longa Hons,
die Anna kimb ols weißa Gons,
die Lisl isch heint a Pirat,
dr Aldi a hochwürdiger Kurat,
in Londeshauptmonn mocht dr Friedl,
die Franzi isch ols Londesrätin a nöt übl,
dr Luis kimb gor ols schworzes Schof,
und jeder mocht gor jedr in Hof.
So sein verkleidet an die fuchzig Leit,
gor jeder isch guat aufglögg heit,
und olla möcht nou beweisn,
miar kearn nou nöt zin oltn Eisn,
und decht wern wianigr Johr für Johr,
hoir fahln vier luschtige Leit sogor,
schnell vergeaht des Löibm,schnell die Zeit,
drum feiern miar mitnond des Heit,
weil oanmol im Johr jo dou geats rund,
dou kemmen die Seniorn kunterbunt.
Die Rechte und die Verantwortlichkeit für diesen Beitrag liegen beim Autor (Anna Steinacher).
Der Beitrag wurde von Anna Steinacher auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 15.02.2012.
- Infos zum Urheberrecht / Haftungsausschluss (Disclaimer).