Da Christbaam nodlt

Da Christbaam nodlt* scho am Stand,
wo i nan kafft hob – Sakradie !
I find des eingli ollahand –
wird in da Stubm ganz gwieß´schnej hi.
 
Mei Wei kehrt jedn Dog ja zamm
und frogt mi: „Woaßt du denn, wiavuj
an Nodln wird der Baam wohj ham?“
San hundattausnd – hob i s Gfuhj…
 
Drum hammas gwogn: zwoa Gramm ham bloß
so hundat Stück. Mia samme(l)n  oiss…
Boid war er nackat (war ned groß)
Zwoa Kilo warn s dann jednfoiss…
 
Dann hamma übalegt - ham kennt
(des geht ja mitm Rechna grod),
dass unsa Baam iatz doch am End
a Million Nodln drauf ghabt hod.    (;-))
 
* nadelt                                                          P.U.  18.12.12