Zugspitztraum

Am Zugspitzgipfe, letzte Woch,        
do is a Adler üba mi
ganz knapp grod drüba, aba doch,
so, dass i n gspüat hob. – Sakradie !
 
Do bin i glatt sei Bruada wor(d)n:
Mia geht a Wahnsinns Ruck durchs Herz.
I gspüa sei Stärkn hint und vorn.
Bin aa a Adler! – Is koa Scherz !
 
I broat de Schwinga aus und fliag
am Sunnaspitzl knapp vabei
zun Eibsee owe und i kriag
mei Adlertauf’ – des muaß so sei…    
 
Mit vuj Karacho schiaß i nauf
in d Fejsn: Heißa - Horridoh !
Und über mia is Sturmgebraus –
bin Adler jatzat – sowieso !
 
>>>>>>>>>>>>>>>>>>>>>>>>>>>>>>>>>
 
Bin aufgwacht und i geh ins Bad…
Wos sehg i do im Spiagl drin?
A Mensch schaut aussa, oafach, fad -
da Paul - a Mensch, wia s i  hojt bin…