Paul Rudolf Uhl
A Bsuach in Passau
A so a Freid - a Bsuach ins Haus…
So lang ned gsehng – iatzt kemmts hoit rei !
S Familienalbum holt ma raus:
Scho zwoa Johr her – mei, konn des sei?
Wia gehts de Ejtan? - Oisse gsund?
Da Hund is gstorm? Naa - ehrlich? – Schod…
De Katz hat aa scho vierzehn Pfund?
Und d Tochta hat iatzt g heirat grod...?
Mia foahrn mit eich aufs Oberhaus,
und i lod eich zum Kaffee ei...
Konzert im Dom? – Für d Oahrn a Schmaus !
Und d Rundfahrt auf de Flüss - muaß sei !
Auf d Nacht dann Urlaubs-Dias- gej?...
Und gähnt hamms – woittn glei ins Bett...
Sechshundat Stück warn doch recht vej !
Waar bessa, wenn ma Ferngsehgn hätt...
Zum Frühstück werds dann fast Mittog;
as ganze Haus kimmt durchanand…
A so a Bsuach ist scho a Plog,
weils iatz scho vej z lang do gwen sand !
I kenn an Spruch, do is wos dro:
Am drittn Dog hoaßts - des is klar -
fangt Bsuach und Fisch as Stinga* o...
A guada Bsuach, der macht si rar!
* zu stinken an P.U. 12.11.03
Die Rechte und die Verantwortlichkeit für diesen Beitrag liegen beim Autor (Paul Rudolf Uhl).
Der Beitrag wurde von Paul Rudolf Uhl auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 30.05.2014.
- Infos zum Urheberrecht / Haftungsausschluss (Disclaimer).