Die Nieren spülen...

De Niern guad spüln, des braucht’s fei scho,
dass koane Stoana gibt – woaßt eh…
In Bayern nimmt ma Bier – ja, no –
und leichta konns fast nimma geh…
 
Mir san jatz in  Toskana für
drei Wochn Urlaub, mei, oh mei,
wia soit i do dann spüln – sog mir -
vielleicht geht des ja aa min Wei(n)?
 
A jeda woaß: Chianti, der
is teia – s konnst fast ned dazohjn*
Wo bring i dann mei Spülung her?
Is a Prospekt in d Händ mir gfojn:
 
Erdinger Weißbier gibts do aa,
Salvator, und Paulaner – mei -
sogoar a Hacklberger – naa –
und Spatn und aa Löwenbräu…
 
ERLEICHTARUNG – es is koa Gfoahr
für meine Niern, bin Sorgn frei
aa Pschorr und Hacker gibt’s do goar.
Italien – i kimm dann glei !
 
* nicht zu bezahlen                              P.U.  22.05.15