Paul Rudolf Uhl
Hundehimmel
Angelehnt an Goethes „Begünstigte Tiere“
(bei ihm waren es Esel, Wolf, Hund und Katze):
Obs an Hundehimme gibt, des
hat mi jatzt moj oana gfrogt.
Hob nan dann auf d Seitn gnomma,
aa eahm glei mei Meinung gsogt:
I glaab ja, da Esl, der is
vorrangig scho vorgmerkt, drum,
weil er n Jesus doch moj trogn hat
und i find, des is ned dumm…
Voarstejn konn i mia, dass s Ross aa
kriagt an guadn Bonus glatt:
Ojs Vakehrsmittl war s erste -
und weil s Postkutschn zogn hat.
Dann da Storch is wohj da nächste,
der s Recht auf n Himme kriagt,
weil der bringt de kloana Kinda
(wenn de Großmuadda ned liagt!).
Aa da Wal hat vuj Vadienste:
Herberg hat er n Jonas gebm…
Aba, wann s koan Himme ned gibt,
konn i aa damit no lebm…
P.U. 11.07.15
Die Rechte und die Verantwortlichkeit für diesen Beitrag liegen beim Autor (Paul Rudolf Uhl).
Der Beitrag wurde von Paul Rudolf Uhl auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 14.07.2015.
- Infos zum Urheberrecht / Haftungsausschluss (Disclaimer).