Streicheleinheiten...

 
A Ehepaar - seit fuchzg Joahr zamm –
liegt wieda moj auf d Nocht im Bett.
Seit acht Joahr is do nix mehr gwen,
doch heit is er zu ihr recht nett:
 
Glangt num und streichlt se am Hoar,
am Hojs und an de Schujtan no,
er fummelt an da Brust sogoar
dann kemman d Händ zun Bauch und Po.
 
Dann d Obaschenkl, Knia und Fiaß
und auffa wieda, links und rechts
se is scho gspannt wos des no wird -
so streichln, is ja goar nix schlechts…
 
Dann heart er aba leider auf…
Sie frogt, warum s ned weida geht,
wo s grod so schee is? - Weida doa,
des fandat* sie jatzt goar ned bled…
 
„Entschuldige - Woar i jatz z grob,
so mittn zwischn deine Knia?
Guad, dass i s endli gfundn hob:
De Fernbedienung woar bei dia!“
 
* fände sie                                      P.U.  13.02.16