Da Neid...

                               Der Neid fällt ja unter die 7 Todsünden…
 
Hast du an Wohjstand, a bravs Wei,
do gibt’s  glei  Neida, zwoa bis drei…
Bist  fleißi  und  dia gheart  a Haus,
und mit de Nachbarn kimmst guad aus,
 
dann is des manche Leit ned Recht:
De machan – naa, de redn di schlecht…
Und fliagst in Urlaub nach Dubai:
Schreib bloß koa Kartn, denn s kunnt sei,
 
dass  oana di glei hassn duad...
Der gunnt dia s ned - der kriagt a Wuat,
weil er si s sejm  ned leistn ko,
seit er koa Arbat hat – und so…
 
Und ruaft wer o, frogt, wia s da geht:
„Ja, mir geht’s guad !“ – Sog des bloß ned !
Do jammat, weil - sunst kimmt da Neid…
Dua  lamentian, des gfreit de Leit!
 
Und hast moj  Glück, sog s ned so laut !
S  gibt vej, de hättn s gern vasaut:
Wenn sie s  ned ham, werd s  koan vagunnt…
De Neida, de treibm s  wirkli bunt!
 
                                          P.U.  22.08.04/18.06.16