LÄRCHEN im Herbst

Schnej geht’s jatzt auf oamoj mit de
Laubbaam:  Gejb werns iatzt und rot,
weil da Hirgst mit Riesnschrittn
einabricht – ja, sappalot !
 
D Nodlbaam  bleibm Sommers, Winters
grea*, des is hojt oafach so,
dass im Winta aa wos greans gibt,
hojtn s eahnan „status quo“…
 
Ausnahm macha do de Lärchn,
de doan s wia de Laubbaam aa,
wer(d)n ganz pfundig gejb und gojdn.
Find i schee, des muaß so sa**…
 
Lärchn gibt’s drobm auf de Berg, do
san s dahoam, do wachsn s guad…
I finds schee, dass s sojche Baam gibt,
in da Sonn leichtn s wia Gluat…
*grün   **sein            Lärchenblüte, Foto Uhl