Dem Enkel seine Braut

                                       nicht autobiografisch
 
Wos, Bua? – Du hast a Wei fiers Lebm?
Hast dia des a guad übalegt,
an guadn Job – konnst ihr wos gebm?
Is oane, de di dann aa pflegt,
 
wanns d ojd bist? - Konn se strickn aa?
Poar woarme Sockn, wanns d as brauchst?
Konn s kocha – weil, des miaßt scho sa,-
bevor s d vahungat aus dann schaugst…
 
Vastehts eich guad – ja, oda is
alloa da Sex, der zamm eich hojt?
Is schee? – Des waar scho wichti gwieß…
I hoff, Du schickst a Bujdl bojd !
 
Sie konn ned boarisch – du ned platt?
Vasteh dead s eich aa ohne Red?
Kemmt s moj nach Bayern - zoag dein Schatz,
damit i woaß, wia s um eich steht!
 
Wos? Schwoarz is? – Sakra – mach koan Scheiß !
Na guad, de Hauptsach: - s is koa Preiß…
 
                                               P.U. 20.11.16