Paul Rudolf Uhl
A Schnee muaß her!
Hoffentli werd Weihnachtn ned grea?
Jatz glangt s uns fei – a Schnee muaß her!
Und zwar sofort, um jedn Preis,
mia Byaern brauch ma s dringend weiß!
An Haufan Lift und Pistn hamma...
Mia miaß ma uns ja direkt schaama,
wenn mia bei „Ludwig Thoma“ lesn,
wia weiß vawaht da Wojd is gwesn…
De gmojdn Krippnbujdln alle
san glatt a Luag in so nam Falle,
wenn nix vom Himme obaschwebt,
des wo des boarisch Image hebt…
Hey Petrus, du - i frog di des:
Wos doan de arma Hoteliers
drin im Gebirg und aa im Wojd,
wenn übahaupts koa Schnee mehr fojt?
Aa d Schifahra duad s arg vadriaßn,
wenn s auf da Wiesn rutschn miaßn;
drum Petrus, dua di endlich bsinna
und lass des Weda ned so spinna!
Merk auf und hear jatzt ganz guad zua:
Uns schiabn s des ollawei in d Schuah –
de Erderwärmung, des woaß jeda…
Es hoaßt doch, DU machst unsa Weda!
Drum schick d Frau Holle mit de Bettn,
dann wähln mia Bayern - i mecht wettn –
gwieß dei‘ Partei, die CSU…
Wenns regnt, dann ned – und schujd bist DU!
GB - ganz bled...
Die Rechte und die Verantwortlichkeit für diesen Beitrag liegen beim Autor (Paul Rudolf Uhl).
Der Beitrag wurde von Paul Rudolf Uhl auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 17.12.2016.
- Infos zum Urheberrecht / Haftungsausschluss (Disclaimer).