Paul Rudolf Uhl
AUS DER BAHN !
Am Fibranz-Bergal samma gfoahrn
min Schlittn und aa mit de Schia…
Glaub, dass mia manchmoj zwanzge woarn.
Alloa, moan i – woar i do nia!
Des Bergal woar scho wengal steil,
doch lang woar s ned, ma woar glei drunt.
Mit Schi hamma oft gschrian: „Schi heil!“
und: „Aus da Bahn!“ – Doch noch ra Stund
woar s langweilig und s Naufsteign goar
oft scho recht müahsam, dann ham mia
liaba a Schneebojschlacht ghabt, kloar!
Und nass woarn ma bis üba d Knia!
Wanns finsta wordn is, nachad hat
da Pappa pfiffn: „Hoam jatzt – Schluss!“
Mia woarn ja eh scho ziemli matt,
koan Aufstand gmacht und koan Vadruss…
P.U. 08.01.17
Foto: Uhl
Die Rechte und die Verantwortlichkeit für diesen Beitrag liegen beim Autor (Paul Rudolf Uhl).
Der Beitrag wurde von Paul Rudolf Uhl auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 09.01.2017.
- Infos zum Urheberrecht / Haftungsausschluss (Disclaimer).