Mei Freindin, da Neie und i

Wia ma mei Freindin de erstn Buidl gschickt

hod, de wos mit ihrn Neia gmacht hod, hob i

mi recht drüba gfreid, aba saumäßig gstunga

hod ma scho a, weil des mei Oida ned so

mitgmacht hod, wia i des gern woin hät.

Hob mi aba dann doch ganz schee gspreizt,

bis i mia aa so Oan zuaglegt hob.

Und heit hob i a soiche Freid mit dem Neia,

wenn i mit eahm den ganzn Dog im Gartn

rum danz und mia zwoa hinta dem ganzn

Viachazeig auf alle Viere noche kriachan

bis mas dawischn.

De Nachbarn wenn uns zwoa zuschaun,

wern song, jetz spind de Oid scho ganz,

aba de seng ja ned gscheid umma,

weil de Heckn so hoch is oda sie so kloa san.

Und wos de Nachbarn üba mi song,

is ma auf meine oidn Dog sowieso wurscht,

scho glei gor wo i doch mit dem Neia

a soichane Freid hob.

Und meina Freindin bin i ewig dankbar,

daß mia, wieda amoi, wia an krankn Gaul,

so guad zuagred hod, zu dem neia

Fotoapparat, aba des braucht so a oida Esl

wia i, hoid manchmoi.

• Autorensteckbrief (Infos & weitere Beiträge)
• gisa-omahotmail.de (Spam-Schutz - Bitte eMail-Adresse per Hand eintippen!)

  Ingrid Höft als Lieblingsautorin markieren

Diesen Beitrag empfehlen:

Mit eigenem Mail-Programm empfehlen