Irgendwia bläd glaffa de Gschicht

Des erste moi gseng hob i des Viach auf meina Terrassn hinta an großn Bleamekibe*, is ja ned grod schee zum Oschaun so a Brooz*.

Wia oi Dog hob i mia dann no bei da Nacht de „Tagesthemen“ eigschoitn und do dazua auf meim Kanapee schee gmiatlich gmacht. Des glab i kennt fast a jeda, erst machst das bloß gmiatlich, dann oamoi schnej a weng d' Aung zua, glangt ja aa wennst
d' Nachrichtn grod herst und scho bist eigschlaffa.

Mittn bei da Nacht wia i wieda wach worn bin. Terrassndiar war oiwei no sperranglweit aufgstandn, sieg i auf mein sindhaft teian Persateppich, an dunkla Fleck. Glei hob i ja gmoit i hät wos ausgschitt, aba wia i genau hischau sieg i, des is ja da Brooz.

Des glabt mia koa Mensch, wenn i des morng ebban vazäj, is mei glei durch'n Kopf gschoßn und dann bin i ganz langsam, daß i den Brooz ned vatreib, um mein Fotoapparat ganga.

Wia i dann grod so schee dabei bin des Viach zum Ovisiern springt der, ohne Vorwahrnung, auf oamoi auf mi zua.
Frog mi ned wia i do daschrocka bin, des war oa Schroa* von mia, da Fotoapparat is ma aus de Händ gfoin und an Bodn drunt glandt, da Brooz mit drei Spring beim Diarl* naus und i hob saubläd gschaut.

 Am nächstn Dog hob i mia dann de Gschicht do ned vakneifa kenna und meim Buam vazäjt und wos moinst das der gsogt hod:

„Mei Muadda du mit deina Fotografierarei, hätst eahm hoit a Bussl gem, des is gwieß a vawunschna Prinz gwen.“

Na ja, wos soist jetz do drauf scho vui song?
In dem Foi is ja fia mi aa schlimma, daß mei Fotoapparat nimma funktioniert, weil fia an Prinzn hät i in meina drei Zimmawohnung sowieso koan Plotz ned ghabt.

Ingrid Höft, Juni 2011

Bleamekibe – Blumenkübel, Brooz = männl. Kröte, Diarl = Türe, Schroa = Schrei

• Autorensteckbrief (Infos & weitere Beiträge)
• gisa-omahotmail.de (Spam-Schutz - Bitte eMail-Adresse per Hand eintippen!)

  Ingrid Höft als Lieblingsautorin markieren

Diesen Beitrag empfehlen:

Mit eigenem Mail-Programm empfehlen