De Karkenbank vertellt

De Karkenbank vertellt

Vör dreiundtwintig Johrn wurr uns Kark renoveert.
Ja, so lang bünt all wi Banken nu all in disse Kark. Hier kriegen wi ok ´n heel bült mit. Denn Freid un Truur sitzen faken tegenanner.

`n Maal satt hier ´n öllere Frau in d´ Bank. De harr so´n leev Gesicht un se strahlde so´n Warmte ut, dat ik besörgt darum weer, mien Holt kunn ansengen. Dat Minske tegen hör kunn de Ogen gor nich van hör laten. Ik löv ja, dat de hör gor nich kennen de, man ik harr dat Geföhl, de junge Frau föhlde sück totaal geburgen an d´Siet van dit Olske. Off Jesus dor woll sien Fingers in d´t Spöhl harr? 

Do weer dor de Kerl, de sien Frau verloren harr. He kunn sük gor nich weer inkriegen vör Pien in d´t Haard  bi d´t Truurgottesdeenst. Vör de Lü hett he sück tosammen nohmen, man mi kunn he nix wiesmaken. He trillde an d´t hele Leven.

Ik bün de daarde Bank vörn up d´ linke Siet. Faken wach ik umsünst, dat sück well up mi hensett. De Lü mögen lever achtern sitten. Man siet lesde Jahr in Sömmer hett sück dat ännert.
Eenst Daags kwam uns Diakonin Simone mit hör Konfirmanden in d´ Kark.
Ik doch: Nett as ´n Kluckhenn mit Kükens. Wat de mi dat good, as söben van de Kükens sück up mi daalleten.
Dicht an dicht, as mussen s´ sück warmhollen. Van nu of an kreeg ik bolt jeden Sonndaag Besöök. Un immer dat sülv´ge Spill. Am levsten weern mien Teenies
´n anner up d´ Schoot kropen.  Ik heeb mi all de hele Week up de Rasselbande freit.
Se weern woll nich immer bi d´ Saak, doch bün ik seker, dat dit Jahr vör hör nich vergebens weer. Bestimmt is wat van de Predigten in hör Harten zackt un heel deep binnen sittenbleven. Viellicht....   in ´n paar  Jahren, wenn dat Leven nich so löppt, as se dat geern wullen, koomt se dorover in d´t Nadenken. Ik wünske hör, dat se denn de Weg na Jesus finnen.

Vör ´n paar Weken weer Konfirmation....    Ik bün eensaam...
©Sabine Brauer

• Autorensteckbrief (Infos & weitere Beiträge)
• Rene.Berggmx.de (Spam-Schutz - Bitte eMail-Adresse per Hand eintippen!)
• 1 Leserinnen/Leser folgen Sabine Brauer

  Sabine Brauer als Lieblingsautorin markieren

Diesen Beitrag empfehlen:

Mit eigenem Mail-Programm empfehlen