Sichten mit Toladen

In d` Sömmerferjen gung ik fröher meesttieds na`n Buur in Siegelsum to arbeiden. Heel besünners völ Pläseer mook mi dat, wenn dat van sichten gung. Mit de groot Knecht Walter weer ik mit leverlaa al good inspölt. Een satt up Trecker, de anner up Sichtmaschin. Hen un weer wesseln wi maal, um dat dat neet so langwielig weer.
As wi dat erst Maal mitnanner up Tuur gungen, do wuß ik heel neet, dat `n dor so völ bi bedenken muß, wenn `n mit `n Trecker un Sichtmaschin up Land fahren un Korn sichten wull. `N paar Saken lüchten mi ja noch in, so as Rohöl up Trecker maken un de Maschinen ofsmeren un so. Man denn kweem mi dat doch all wat sünnerbar vör, as Walter an mi see:“ Haal mi even noch `n Körv vull Törf, maak `n Buddel vull Rohöl un legg de dor unner.“ Wat dat nu mit sichten to doon harr, dor wuß ik mi keen Riem up to maken. Un denn harr Walter savends vördem ut Nahbers Tuun noch `n paar Salatbladen halt, de ok mit na `t Land mussen. Wiel disse Baantje aber neei för mi was, froog ik neet groot, wat dat all up sük harr. Well will sük denn blameren? Nu weer`t aber sowiet. De Buur see an uns, nu wurr dat ok Tied, dat wi wegkwemen, anners weer de Dag ja up. Wi fohren mit all uns Reev to. As wi up `t Land ankomen weren, wurr dat erst maal all so torechtmakt, dat wi man so anfangen kunnen. Denn nohm Walter so`n Stück of tein Törfen un stapel de moi an d` Slootskant up. Nu kweem de Buddel mit Rohöl an d` Rieg. Dat Öl wurr over de Törfen goten as Soß over d` Pudding. Uplesd nohm Walter `n Rietstick, mook de an un hull hum an de Törfen mit Soß. Dat flunner heel moi. Nu doch ik, dat he villicht noch `n Pott mitnomen harr un Spinat van de Bladen ut Nahbers Tuun maken wull. Man dat weer neet so. He nohm een van de Bladen un see:“ Dat is `n Blatt van `n Tabaksplant.“ Do gung mi tomaal `n Lücht up. De sull nu seker an `t Für drögt worden un denn in d` Piep. Aber weer verkehrt docht. Dat Blatt wurr moi um de gleinig Utpuff wickelt un mit Wier fastmaakt.
As wi nu eenmal um weren, wurr anhollen un dat Blatt van d` Utpuff ofnomen. Dat weer nu knakendrög, wurr so in d` Hand gruust un kweem denn in d` Piep. So gung dat de heel Dag wieder. All paarmaal um kweem weer `n Blatt an d` Utpuff un Walter harr weer wat för sien Piep to dampen. Dat Für muß blot wesen, wiel he neet so völ Rietsticken harr.
Hett lang dürt, bit ik begriepen kunn, dat`n wegen so`n bietje Rokeree so`n Gedrüs maken kunn. Man denn versöch ik dat Roken ok maal. Erst smook dat overhoopt neet, man nahst segg mi dat woll to. Ik harr woll keen Tabaksbladen, aber Moder harr Tee van Lindboomblössems. De stunn wiers al jahrenlang in d` Kökenschapp, wiel de nüms drinken much. Mi kweem de aber good topaß, bruukde neet gruust of drögt worden, de weer al heel klaar. Stunk woll `n bietje, man leet sük good roken. Aber, wenn de Tee ok keeneen much, he muß ok ja man even ut Köken klaut worden, nett as Walter sien Bladen ut Nahbers Tuun. Disse Arbeit hett mi immer um meesten mitnomen un dor hebb ik ok bi lehrt, wat Hartkloppen is. Man wat deit `n neet all, wenn `n wor Sinn an hett.

• Autorensteckbrief (Infos & weitere Beiträge)
• rudolfelsterweb.de (Spam-Schutz - Bitte eMail-Adresse per Hand eintippen!)

  Rudolf Elster als Lieblingsautor markieren

Diesen Beitrag empfehlen:

Mit eigenem Mail-Programm empfehlen