Der Adventskalender

Weihnachtsgeschichten sind meistens recht schön ausgedacht und ganz, ganz friedlich. Dieses Zweiergespräch fünf Wochen vorher ist ehrlich erfunden aber echt realistisch. Die Martha macht schon was mit mit eahm, dem Karl, dem oidn Grantler!
M: Du, Karl! Bald hamma an Dezember und mir brauchen no an Adventskalender!
K: Du brauchst oan! Net mir!
M: Du Karl, a Adventskalender ghört halt einfach zum Advent!
K: Wennst unbedingt moanst, dann kauf dir halt oan. Beim Aldi gibts oan um 99 Pfenning.
M: Naa! Koan solchen, der is ja grad für kloane Kinder.
K: Und? Kloane Kinder moanst hamma net. Weil dei Bua mit seine 33 Jahr z'bleed is dazua, daß er mich endlich zum Großvatern machen taat.
M: Jetzt tuast du dem Buam aber Unrecht. Du hast dir ja aa bis 35 Jahr Zeit lassen mit dem Buam.
K: Was hat jetzt dees mit deinm Apfenzkalender zum toa? Daß du nia beim Thema bleibm kannst?
M: Woaßt, Karli. I möchat aa koan Adventskalender mit der lila Milka Weihnachtskuah, son-dern an richtig schönen.
K: Und außerdem ist der Apfenzkalender ja eh koa richtiger Apfenzkalender. Der geht ja net amoi am 1. Apfent an. Der fangt einfach a jeds Jahr am 1. Dezember an und dees is meistens gar net der 1. Apfent.
M: Da hast ja recht, Karl. Aber der Adventskalender sollt ja aa grad die 24 Tag bis zum Heili-gen Abend anzoagn.
K: Und die Kerzen am Apfenzkranz. Warum müassn dees ausgerechnet viere sein? Und net meinetwegen achte! Für an jeden Mittwoch aa no oane? Zum Beispiel! I moan ja grad!
M: Du Karli! Woaßt, beim Feinkost Wurm in der Stadt, da hättns an Adventskalender mit Spezial-Konditor-Pralinen.
K: Warum zündt man den Apfenzkranz net anderst an? Am ersten Apfent vier. Für jede Woch, die mir no bis Weihnachten habm, oa Kerzn? Und jede Woch oane weniger. Oder zwoa, bei achte!
M: Hinter jedem Türl eine Spezialpraline. Und an Deckel mit echte Plastikengerln hat er aa. Sooo goldig! Den möcht i!
K: Und warum kannt der Apfenzkranz net a Lorbeerkranz sei? Den kannt man dann für a Sie-gerehrung aa hernehma.
M: I sag dir, ein Gedicht, der Adventskalender von Feinkost Wurm! Aber 49 Mark 90 kost er, der Adventskalender!
K: Und auf Weihnachten der Christbaam! A weißer muaß dees bei ihr immer sein! A roter glangt ihr ja net, der Madam!
M: I woaß scho, a wengerl teuer is er scho. Aber die 24 selbergmachten verschiedenen Prali-nen sand aa an Haufen Arbeit.
K: Warum muaß dees eigentlich immer a Nadelbaam sein? Wo mir doch im Wohnzimmer eh so a schöne Yukkapalme oder an Gummibaam hätten für an Christbaam. Dees waar amoi was ganz was anders. Und billiger waars aa.
M: Für jeden Tag eine einzige Exklusiv-Praline hinterm Türl! Eine einzige daat i mir schon vergönnen. Eine einzige nur! Die schlagert sich net gleich auf die Figur!
K: Und dann allerweil die komischen Kerzen an dem Baam. Mir habm zwar scho lang a elekt-rische Lichterkettn, aber warum net a Liachterkettn mit farbige Gummibärli an einer Yukka-palme oder am Gummibaam? Warum eigentlich net?
M: Daat i mi gfreun auf die Pralinen vom Feinkost Wurm!
K: Anstatt dene Glaskugeln, da wost du eh jeds Jahr mindestens zwoa zsammhaust, da kanntn mir solchene hernehma, die wo sie bei der Auslosung zum DFB Fußballpokal haben.
M: Und a jede ist extra einzeln verpackt in a schöns weihnachtlichs Aluminiumpapierl! Daß die Pralinen aa den ganzen Advent über recht schön frisch bleiben.
K: Statt die Fuaßballmannschaften könnt man was anders in die Kugeln einitoa. Wia bei am Überraschungsei zum Beispiel.
M: Schau, Karl, den Advendtskalender, den möcht i halt so gern. Da bräucht i dann fast koane Weihnachtsgeschenke mehr!
K: Mit solchene Kugeln am Christbaam waar dees fast wia bei am Apfenzkalender. Und i kannt an Pirelli-Kalender kriagn.
M: An Aldi-Adventskalender! Für 99 Pfenning! Eahm schaug an!
K: Mitm Pirelli-Kalender, da hätt i dann jeden Monat an Reifen aufm Kalenderblattl und a schöns jungs Madl ohne Montur.
M: Jetzt spinnt er total, der oide Depp, der depperte!
K: Dees waar amoi was ganz was anders, 's ganze Jahr über so was wia a Apfenzkalender mit nackerte Weiber. Beim echten sand hinter dene Türln ja aa grad Buidln. Nur gfallen mir die Buidln beim Pirelli-Kalender weitaus besser!
M: Mir vergönnt er koan Adventskalender vom Feinkost Wurm und er möcht an Advents-Lorbeerkranz und an Gummibaam mit gscheckerte Gummibärli als Christbaam und in den Weihnachtskugeln drin lauter nackerte Weiber! Der Aff der damische!
K: Spinnerte Wachtel, spinnerte! Grad wegen dem Kalender!
M: Du Sittenstrolch, du perverser!
K: Wennst du dir dein Apfenzkalender vom Feinkost Käfer...
M: Feinkost Wurm! Wurm!
K: ... dann kauf i mir mein Pirelli-Kalender erst recht!
M: Und i laß mi von dir scheidn! Daß dus woaßt! Wegen seelischer Grausamkeit und sexuel-ler Exzesse! Lackel gscherter!
AUS!!! Ende des Gesprächs - bis voraussichtlich 1. Advent!

• Autorensteckbrief (Infos & weitere Beiträge)
• seppgruenbergeraol.com (Spam-Schutz - Bitte eMail-Adresse per Hand eintippen!)
• http://sepp-gruenberger.de

  Sepp Grünberger als Lieblingsautor markieren

Diesen Beitrag empfehlen:

Mit eigenem Mail-Programm empfehlen