Kunnendeenst

För´n poor Weeken weer de Kunnendeenst bi mi, um mien Heizung kloor to mooken. Jüst op´n Friedag weer mi de Heizung twei gohn, und so heff ik obens noch bi so een Heizungsfirma dörchtelefoniert, dat doch wohl am Sünnoben noch een Monteur koomen schull um mi dat wedder in Schuß to bringen. He keem denn je ok, blots, morgens Klock Acht! Op´n Sünnobend! Ik sloop doch op´n Sünnobens bit Klock Negen! Na, den heff ik villicht een poor Reegen vertellt! Vun wegen dat de Kunde König is und so! Und op he dat hebben much, wenn he morgens al so fröh ut Bett smeeten ward! Spinnt wohl de Kerl! So bi Klock Tein vertellt he mi denn, de Brenner weer twei und dat he am Mondag wedder komen muss, wieldat he nich dat richtige Ersatzdeel bi sik hal.
Erst heff ik dacht he wull mi op´n Arm nehm, und so´n beten Spark mooken. Aver ne, de Minsch meen dat ernst! Also, segg sülms, is dat ni...! Erst lött he mi inne koole Bood fröhstücken, um denn wedder noh Huus to fohrn. Und worum hett he mi denn erst ut Bett smeeten, frog ik di?
Kummt mit so´n grooten Wogen anfohrn, und hett ni dat richtige Ersatzdeel mit! Dat giv doch blots Twee verscheedene Sorten vun Brenners, Roode und Blaue, dor kann man je wull eenmol dat richtige Deel mitnehm!
Aver he meen, dat keem ni op de Koleur an, de Nohm vun de Herstellerfirma weer wichtig. und wenn ik em dat glieks verkloort har, denn hal he uk dat richtige Ersatzdeel mitnohmen.
Scheeten döffst ni, dach ik, nu muss du lüttbigeben, und em am Mondag wedderkomen loten.
Aver, trotzdem, so veele verscheedene Deele kann dat je nich geben, und de Wogen wer groot genoch, he hal dat richtige Deel man gern mitbringen kunnt.
Mondag keem he denn uk. Ik heff denn uk al Klock Süss op em töövt, aver wi dat so is, he keem Klock Tein. Kann de Minsch ni eenmol to richtige Tied komen? Mutt dat denn den halven Nohmiddag wehn? Dor stoh ik extra an mien frien Dag fröher op, dat de Handwarker rinn kann, und denn kummt he to Fierobend! Na ditmol weer ik avers in Rage! Vun Kunde und König weer nu keen Snak mehr. Kaiser! Kaiser weer ik,... mindestens!
Sien Chef hett em noch woanners hinschickt, säh he. Dat kann je jeder vertell´n. Sien Chef, nu schick he uk noch sien Chef vör, um sik ut de Sch.... Ne sowat! Heizung kloor moken, säh ik und denn aff vun Hoff! De kummt mi ni mehr in´t Huus!
Poor Dag loter keem de Reken. Sömbtig Mark hett he de Stünn nohmen, Sömbtig Mark! Dat weer toveel! För wat, frog ik mi, för wat denn blos? Nur dat ik de Stuuv wedder warm heff? Sömbtig Mark de Stünn? An- und Affohrt musst uk noch reeken. Mol Twee, dat mokt mol veer Stünn, tööv mol.....! Ach wat, is op jedenfall toveel!
Dor kann ik lever mien Auto inne Warksteed bringen,- de nehmt zwar hunnerttwintig Mark de Stünn, aver dor heff ik jedenfalls wat vun! Wat, du meenst ik weer ungerecht? Ne, ik weet wovun ik snak. Mondag goh wedder to Arbeit! ...Waschmaschinen heel moken!
Wat, dat drifft sik good? Dien Waschmaschien is twei? Ik schall se mi mol ankieken? Und dat geit nur Sünnobend? Kloor koom ik, Klock söben bün ik dor! - Kost sömbtig Mark de Stünn

• Autorensteckbrief (Infos & weitere Beiträge)
• manfred.beyerplattland.de (Spam-Schutz - Bitte eMail-Adresse per Hand eintippen!)
• http://plattland.de

  Manfred Beyer als Lieblingsautorin markieren

Diesen Beitrag empfehlen:

Mit eigenem Mail-Programm empfehlen