Abenteuer im Internet

Gestern bin i drinna gwesn:

Gsurft a wengal - bloß a so...

Und auf oamoi  hob i  glesn:

„Klickn`s  doch den Button  o´!“

O´klickt hob i  (bin a Dummer!)

- Ei´g´rutscht wia auf Soafnschmier

(mit ´ra Hundertneinzga – Nummer)

bin I ! – Konn fast nix dafür…

Stoppen duad mi dann recht drawi  (eilig, heftig)

d´ Viren - Datenpolizei

            Ziagt an virtuellen Sabi,              (Säbel)

mecht mei  Passwort – aber glei!

„Bin koa unerlaubter User

und i woitt gar ned do her...

Software - Fehler – a konfuser!“

(Liang is do herinna schwer!)        (lügen)

Kimmt aa no a Virenscanner,

prüft auf  Datenkorruption…

`S Passwort brauch  i nimmer nenna,

schluckt mi glei - ohne Pardon;

Muaß durch tausnd Kabel sausen,

und durch an Zerhacker-Chip!

Panik  hob i,  Muffn-Sausen...

Des  is  ja  a  Höllentrip!

Endli´ hob a Loch i  gfundn:

Durch an USB-Anschluß

hupf  i naus und foi nach untn

aufn Teppich... - Dann war Schluss!

Finanziell woar`s  aa no  Kummer!

D´Telekom hat obkassiert:

Des woar erst a Horror-Nummer!...

Do hamms mi ganz schee rasiert!

                                               P.U.  29.12.03