Magnetsturm

                       Katastrophenszenarium

Achtzehn neinafuchzg is´ gwesn;      (1859)

Sonnasturm, a schlimma woars…

Hob im Lexikon wos glesn,

wann i dro denk, werds ma hoaß:

Telegrafn – de san damois

nimma ganga – da hams gschaut!

Überspannung jednfoiss

hat eah oisse zammaghaut…

So a Sturm wenn heit moi kamat        (käme)

Bruada, da waa oisse hi´:

Satellitn brechn zamat,

Chaos gaab`s  und Hysterie…

Aa de Festplattn – muasst wissn –

vom PC werdn  g´löscht – vabei…

D´Industrie is auffegschmissn,

lahmglegt is  aa d`Polizei…

Fernsehn, Radio gengan nimma

Handys  aa ned. - Oiss fallt aus:

Ampel, Weichn, und – no schlimma:

Nix geht mehr im Kranknhaus!

Ohne Strom, da stehn de Züg´ fix,

d`Wirtshäusa sperrn zua ganz staad,

koa Zentralheizung – koa Gejd – nix…

Es geht aa koa Bankomat!

In da Tankstej gibt`s  koan Sprit ned,

weil de Pumpn nimma geh´n,

drum – des find  i wirkli ganz bled -

bleibm de Autos aa boid steh´n.

Dass des ausbleibt, ha(b)m  zum Hoffn

mia ja wirkli jedn Grund!

Doch: Ob nix passiert, is offn…

Sonst  waarn mir - ganz arme Hund…

                                                                 P.U.  25.12.08