An guadn Wurf

As Le(b)m, des is  a  Würflspui;

mia  würfln  olle  Dog…

Hast Glück, na gibt da  `s Le(b)m recht vui,

wann ned, hoaßt´s   Müah  und  Plog!

Drum würflt´s  Leit! - „Pasch sechs“  soi`s  sei,

da höchste Wurf, den`s  gibt…

Wannst schlechta  wirfst, is`s  gfährli fei;

na hast glei oiss vasiebt…

I wünsch dir oiwei  oa Aug mehr,

ois wia dei Konkurrent,

dei  Feind, dei Chef, da  Kommissär,

weil sunst da Huat dir brennt…

Drum wirf an Sechsa-Pasch je´n Dog

Na konnst nimma valiern.

Ob `s hi haut? – Ja, des is de Frog…

Du muaßt`ms  oafach probiern!