Auswärts *

Hock auf da Hausbänk in da Sunn;

de Strahl´n, de streichln mi ganz staad…

Vorn, do am Hauseck röhrlt da Brunn,

mir is, ois ob i schwe(b)m  scho daad…

An Amsl zwischat aufm Haus,

im Baam, a Meisn bitzlt her…

Eiwendi woarm – ja, do waar`s aus;

i woaß, iazt kimmt koa Kejtn mehr.

Da Auswärts* macht, dass oisse bliaht,

de Veigaln und da Seidlbast…

As Früahjoahr macht mi bissal miad:

I kunnt a wengal ruaßln fast...

Mach d`Augn zua… – Horch – wos  is´n  des?

As Gros wachst! – Schmarrn! - Doch oans is gwieß:

Bin wirkli froh (und aa mei Res´),

dass endli wieda Auswärts is!

                                                               P.U.  04.04.09

* der Frühling