Die "Kur"

 
Da Furtner Hans vo´ Mesnerschlog,

der sitzt am Stammtisch jedn Dog.

Auf oimoi hat ma `n nimma gsehng...

De Spezi hamm scho gredt desweng!

Ma sogt, der Hanse waar zur Kur,

bei so am „Doktor Reaumur“...

Doch glau´m se `s olle ned so recht,

denn - gsuffn hat da Hans ned schlecht,

und irgendwann, do kimmts aa raus:

da Hans, der liegt im Kranknhaus!

De Leber spinnt – iatzt werd „entzogn“,

und olles andere waar g´logn…

- Seit gestern is a´ wieder z´ruck

Und trinkt bloß Wasser no´- gluck- gluck...

Wird g´frogt, was für a „Kur“ des war...?

„Na, - bloss zum Obnehma – is klar!“