Oskar Stock
Musik im Haus
In da Nachbarschaft, o mei,
ziagt a neia Mieta ei
und de Nachbarn, wia's so geht,
schaugn, wia's um den Umzug steht.
Couch und Sessl, Kindazimma,
Stuih und Tisch, do na werd's schlimma,
ois de Nachbarn voia Schreckn,
an Hund ... und a Klavier entdeckn.
Des Viecherl, moanan's, waar net zwida,
do des Klavier ... und oiwei wieda,
schaun sie auf des schwarze Drum;
es draht se schier ihr Mogn um.
Und sie hörn scho iatz Sonatn,
Etüdn, Liada und Kantatn,
Fingaübungen, frapant;
olle san vor Schreck gebannt.
Do ois de Mieta ei'gezogn,
da hot des Vorurteil getrogn;
denn Liadl hört ma, liab und nett,
wia ma's mog und aa gern hätt'.
Ois na de Spielerin bekannt,
blond, achtzehn Jahr und fesch beinand,
da macht des olles nix mehr aus --
endle is Musik im Haus!
Oskar Stock
(Aus dem Buch: "Von Mensch zu Mensch",
erhältlich beim Autor Oskar Stock,
Sonnenstr. 21, 84030 Landshut-Ergolding)
Die Rechte und die Verantwortlichkeit für diesen Beitrag liegen beim Autor (Oskar Stock).
Der Beitrag wurde von Oskar Stock auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 26.01.2010.
- Infos zum Urheberrecht / Haftungsausschluss (Disclaimer).