Mein Passau

            Wo gibt’s des, dass an oana Stej

drei große Flüss zamm ströma?   

In unsara Dreiflüsse-Stodt          

do war´n ned grod de Römer,      

die Keltn warn davor scho do…

Vor guad zwoatausnd Joahr ham

scho Leit do gsiedlt, des is gwiss

(de Gschichtsschreiber  sogn´s oi z´samm).

Da Innkai mit´m Schaiblingsturm

schaut aus, wia italienisch! 

Des Passau is Touristn-Stodt

und sauber und hygienisch…

As Oberhaus*, da hohe Dom,

und `s  Dreiflusseck, des scheene,

Mariahuif und `s Kachlet no´,

des is oiss „molto bene!“

^                                              Kultur gibt’s gnua,  in unsra Stodt:

Ob Maler oder Sänga,

Theater oder Musiker…

Und fromme Leit – scho länga.

Es gibt aa Bildung, Wissnschaft,

a Uni voi Studentn,

und Dichta  voller Schaffnskraft

herent  vom Inn und drentn.

Des oanzig Schiache, des is grod

as Hochwasser… – Zum Woana!

Weil’s  do hoit so vui Wassa hod

vo Inn und Ejz** und Doana…  

                                               In Passau, do bin i dahoam!

                                               Mog´s andre scheene Städt no ge(b)m:

                                               Du, Passau bist mei Hoamatstodt.

                                                Wo andast mech i  nimma le(b)m!

*      die Veste Oberhaus, Rückzugsburg des Fürstbischofs

**   die Ilz