die kranken Krankenkassen

 
I hob z'letzt in da Zeitung glesn
und des is gwiß koa Witz ned gwesn,
dass d' Krankenkassen sejba krank
und scho mim Buckl stehn an d'Wand.


Und bloß a finanzielle Spritzn,
daad sie vom Kollaps jetzt no schützn,
dass ned in Pleite nei maschiern,
weil ihre Kostn explodiern.


Sie ham so an acht Euro denkt
des bisse Beitrag, waar fast gschenkt,
wennst schaust, wos do dafia oiss kriagst
scho von da Wiang weg, bis dann stirbst.


Ja, de acht Euro zoihn mia gern,
wenn dann im Vorstand drin de Herrn,
an eahnen Ghoit ned miaßn sparn
und scheene große Auto fahrn.


Mia wern aa ned an Tisch nei haun,
wenns Bürotürm uns vor d'Nosn baun
und redn eahna gwiß ned drei,
wenns richtn de recht nobl ei.


Mia reng uns do ned am Kloazeig auf:
Morng haun`s uns vielleicht d'Schaufe nauf.
Wos nützt uns dann des scheene Gejd
no do, auf dera bucklat Wejt.


Wos san denn so acht Euro - mei
und z'tod no g´ärgat host de glei.
Denk dro moi, wos as Eigro(b)m kost,
vielleicht is des dia dann a Trost.