Moderne Zeiten (3)

De Nacht zum Mai - do is mia eh
a ganz a greislichs Wei begengt:
Hockt in am schwarzn Cabriolet
und sogt, sie hofft, dass heit ned rengt…
 
„Wo woinns denn hi?“ - stej i mi bled…
„Nach Goslar!“hat se gsogt – „Und wie
fahr ich am besten, dass´ schnell geht?“
- Sie mecht no heit zum Brocken hi…
 
Aha ! – Walpurgisnacht ! – A Hex !
So hob i  blitzschnej kombiniert…
An Besn brauchn`s  nimma jetz –
de ham  ja aa modernisiert…
 
Und ob i mitfoahrn mecht – hat`s  gfrogt –
zun Danzn! - Heit gaab`s  Rock-n Roj…
„Naa, naa – mei Knia“ – hob i drauf gsogt…
(Hob mi ned traut – hob d`Hosn voj).
 
Wann`s  jung und blond gwen waar und schee
(vielleicht danoch a bissal Sex?)…
Doch so – do lass i`s  liaba steh…
Dahoam hob i doch sejm a Hex!
 
                                                                    P.U.  18.08.10