De Deitschn sterm aus

In da Zeitung hob i glesn,

is vor a poar Dog erst gwesn,

daß mia Deitsche alle zam,

jetza scho am aussterm san.

Und de Bild legt no oans drauf !

Zajht de Schuidign glei auf:

Pille steht do ganz vorn dro

Politik ja sowieso.

Und de Madl - sejbstbewust,

ham ja aa koa rechte Lust,

woin heit liaba no studiern

und erst späta Kinda kriang.

Hams studiert dann kimmt aa no

de Karriere – erst moi dro.

Ja - wos daadst do mit an Kind,

bleibt de Arbat doch grod hint.

Fia a Kind is ja no Zeit,

muaß no wartn, duad ma leid.

Kind und Arbat geht ned zam,

weil ma fast koa Krippn ham.

Mit da Arbat hams a Freid

und da Wohlstand macht se breit

Urlaub mecht ma a no fahrn

auf a greßas Auto sparn.

Aa a Heisl muaß no her

Kinda brauchan Plotz ja mehr,

daad de Kinda gwieß aa gfoin.

Miete braucht ma aa ned zoin.

Und so schiabt mas hin und her

oiwei kimmt no schnej wos quer

und bist schaust do is vabei:

Zeit zum Kindakriag – Ja mei -

Ingrid Höft         September 2010