Ja mei, Herbst werds

De Sonna scheint! - Jetzt nix wia naus,

an Haufa Arbat rund ums Haus.

No s' Laub zamrechan, s' Radl putzn,

den scheena Dog den muaß ma nutzn!

An Bürgasteig no obekehrn,

und dann erst kons schlecht Weda wern.

Aa d' Fensta kanntn s' Putzn braucha,

dazwischn schnej no Oane raucha...

Mei Schupfa mach i aa scho dicht,

daß ma vom Schnee ned zama bricht.

De Bleame miaßn jetzt no weg,

und hintan Haus, do liegt a Dreck.

An Haufa Arbat kimmt glei zam,

bis ma oi Jahr an Winta ham.

Vorher no schnej des Essn richtn,

i wui do drauf heit ned vazichtn!

Glei noch'n Essn fang i dann o,

weil d' Arbat lafft ja ned davo.

Hob i dann gessn bin i saumiad,

wia ma do glei s' Alter gspiert!

Jetzt muaß i erst a Stündal schlaffa,

de Arbat wer i scho no schaffa.

Ja, bloß de Dog de wern hoit jetza,

scho dummaweis, aa oiweii kiarza.

Bis i mi umschau is glei Nacht

und Arbat is no koane gmacht.

Wo is denn bloß der Dog heit bliem?

Hob grod amoi a Versal gschriem

und manchmoi frog i mi dann scho

wia bloß da Mensch so faul sei ko.

• Autorensteckbrief
• gisa-omahotmail.de (Spam-Schutz - Bitte eMail-Adresse per Hand eintippen!)

  Ingrid Höft als Lieblingsautorin markieren

Diesen Beitrag empfehlen:

Mit eigenem Mail-Programm empfehlen