Üwa de Brezn oda a Brezn

Ih sog engas a so a Brezn is guad
Hob mitn söwa mocha nix am Huat
da gibts Bäcka de san perfekt
beim probiern is mei Toag vareckt

Ana Legende noch hods a Bäcka erfundn
der hod dadurch den Tod umwundn
Sei Landherr hod zu eam gmoant:
„Back an Kuchn durch den drei moi de Sunn scheint
dann wirst ned ghenkt.“
Da Bäcka hod Brezn gmocht,
da Landsherr hod eam sLebn geschenkt

Do siagt mas wieda amoi
ham friaha ah scho gwisst wos guad is, goi
eiwücken in a so a Laugnbrezn kunnt ih mih
De tuat ma bsondas taugn, iss mit an Genuss dahi

Gibt a Brezn, de san siass
ma schenkts z`Ostern mit a poar Griass
mit Zuckastreusl und Rosinen drin
do mochst bei jung und ois an Gewinn

Tjo mei, jetzt gibt’s owa ned netta Brezn zum Essn
hätt ih do glott auf de anda vagessn
mit ana Brezn kummt oft oana hoam
do woass sei Weibal ned wos mit eam tuan

A Brezn wannst host grissn
na da hots de hoit gschmissn
A Brezn is guad, a Brezn is schlecht
kimmt oiwei drauf an wos grod steht

Oans sog ih eng scho nu gschwind:

Moch bei dein Mann zweng ana Brezn koan Bahö
geh liaba zum Bäcka und kauf da oane zum Essn ganz schnö