Kindheitserinnerungen

Sitz de anständig hi, sonst kriagst an Buckl,

hod mei Muadda zu mia gsogt,

wenn i ma's grod irgendwo

schee gmiatlich gmacht hob,

daß ma vom Arbatn a an Buckl kriang kon,

hods ma ned varon.

Host scho wieda a Biache in da Hand,

hods mi oiwei gschimpft,

wenn's mi beim Lesn dawischt hod,

warum i des Lesn lern, wen es dann ned doa soi,

hob i nia vastandn.

Host du koa Arbat,

hods mi jedsmoi gfrogt,

wenn i amoi beim Nochdenka dagsessn bin,

daß Denka a an Haufa Arbeit sei kon,

hods vielleicht ned gwußt.

Sonst hät's ma ned oft an soichan Schmarrn vazählt,

wenns vorher mehra drüba nochdenkt hät.

Aba sie hods ma ja bloß guad gmoint.