Leberschaden...

An oidn Freind seit ganz vui Johr 
hamms  ei´grobm gestern – vui ham gwoant...
Sei´ Leber: War `s Zirrhose gor?  
- Dass´ so schnej´ geht, hat koana g´moant...
„Mir konn a so was ned passiern“ 
- hat oana gsogt beim Leichnschmaus...
Do mecht i´ fei´ ned debattiern:
So was geht schnej – bis d´ schaugst, bist drauß !
 
                       
 
... A Jubiläum im Büro,
am Vormiddog – „bloß“ zwoa Glas Sekt...
Do kimmst ned aus, des is a so
(fuchzg  issa worn, der Architekt...)!
 
Auf d´Nacht: zum Griechn (da is fein !):
An Uzo gibts – der geht aufs Haus...
Zum Dringa? – Eh klar - hoit an Wein;
Des ghört dazua  -  kimmst ja ned aus.
 
A  Gschäftsfreund an  `ram Tisch - ned weit
der fahrt für uns  a Lage her.
Ma dankt und trinkts: aus Höflichkeit...
(I woitt  ja eingli koan Schnaps mehr!)
 
An Digistiv – beim Zoin - aufs Haus ! ...
Dahoam sitzt ma dann aa no zamm:
„A Glasal geht no - `s waar ja aus – „
(obwohl ma  scho Promille hamm)...
 
Gehts  so,  glei zwoa – dreimoi de Woch
- und des is überoi der Brauch -
i sog dir :  „Gfährlich is des doch:
Sowachst der Leberschodn im Bauch“!
 
                                                                       P.U.   09.10.03