Roswitha Pogotz
Da Schnee deckt vü zua
So a Schnee deckt vü zua
In Nochbarn sei frisch gmaahte Wiesn is weiß.
mei ungmahte Wiesn is grod a so weiß –
und des Unkraut zwischen de Bleamal ah
So a Schnee deckt viel zua
De Schloglöcha und Muckeln auf da Strossn san weg.
de Autos foahrn jetzt a wenig langsamer, voill Ruah –
koana rast mit an siebzga in d´Kurvn.
So a Schnee deckt vü zua.
Am Nußbam im Nochbarn sein Goartn liegt Schnee.
De Föhren und Fichtn san grod a so weiß –
dass de Bam olle krank san, siagst nimma.
So a Schnee deckt vü zua.
Beim Schneeschaufeln geht grod a Nochbar vorbei.
I griaß eam freindlich, er dankt ma a glei –
Wann sei Wogn auf meim Parkplotz steht,
kunnt i n dawürgen!
So a Schnee deckt vü zua
San mir ned a manchmoi so wia a Schnee?
So unschuidig, sauba, frischgwoschn und schee?
So scheinheilig, foisch und valogn?
So a Schnee deckt vü zua
Mit so manchn Kumma und Unfriedn is a Ruah
Schauts auf eich und dem nebenan
Wei ma ned gnua zfriedn sei kann
Vorheriger TitelNächster Titel
Die Rechte und die Verantwortlichkeit für diesen Beitrag liegen beim Autor (Roswitha Pogotz).
Der Beitrag wurde von Roswitha Pogotz auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 08.12.2010.
- Infos zum Urheberrecht / Haftungsausschluss (Disclaimer).
