Gedanken zum Jahreswechsel

 Ja wo is denn bloß wieda des Jahr hi kemma

is denn de Zeit, mit de Jahr nur no am renna ?

Am End vom Jahr stell i mia imma wieda de Frog

hod des Jahr wirklich dreihundatfünfasechzg Dog?

Kam draht ma se um san dreihundatsechzg weg

und des neie Jahr schaut scho wieda ums Eck.

Aba fangt ma dann erst amoi des rechnen so o

wois ma glei warum do koa Zeit übrig bleim ko.

30 % ham ma laut Statistik davo scho vaschlaffa

genau so vui Zeit san de meistn in d' Arbat glaffa,

wenn ma dann a no de Urlaubsdog weg nehman

und no de Sonn- und de Feiadog dazua kemman,

dann kon ma, in oan Jahr, des derfts ma scho glam

grod amoi ganze 25 Dog zum Lem übrig ghabt ham.

Nach Adam Riese bringt ma do koane 600 Stund zam

de dann vielleicht no fias Nixdoa so übrig blim san.

Von dene poar Dog gegan dann de meistn valorn,

weil ma von gestan red, oda ma gfreid se auf morgn

und warum de meistn Leit bloß no Zeitnot kennan

is weils nur no von oan Termin zum Andan hi rennan

hams dann amoi Zeit, wos do mit Gwalt ois macha

zum Zeitvatreib, da kon ma doch bloß drüba lacha

i denk ma mei Sach und stell mia manchmoi de Frog

wia kon ma wos vatreim, was ma gar nimma hod?

Als Kinda is uns de Zeit no vui mehra vorkomma,

aba do ham ma uns de Zeit ja einfach no gnomma.

Vielleicht a weil ma do vui Zeit mit wartn vabringt

und oan do de Zeit sowieso bsondas lang vorkimmt.

Aba vielleicht hängt des Ganze a bloß damit zam,

weil mia als Kinda no koane Uhren ghabt ham.

Nur de Stund vor 'm bettgeh, des wois i no gwiß,

daß uns de a damois scho imma vui zkurz gewesn is.

Fias neie Jahr waars am bestn, daß ma se nix vornimmt,

weils doch im Lem, sowieso oiwei ganz andas kimmt

und bleibt oan dann a Zeit übrig, kannt ma dro denga

und sich de übablieme Zeit einfach amoi selba schenga.





Zum Jahreswechsel habe ich einige meiner allerersten Gedichte ausgegraben und festgestellt,
daß sich in zehn Jahren an der Hektik der Menschen, trotz der vielen guten Vorsätze, nichts verändert hat.

(Anhänger der Metrik möchten mir diese Veröffentlichung verzeihen, aber es ist noch nie ein Meister vom Himmel gefallen)