Üba Gschmack laßt se streitn!

De oane schreibt gern üba d' Liab,

und mancher aa moi üban Kriag.

Mia schreim von Trauer, Leid und Gfui

und aa von Umweltsündn vui.

Beim Schreim, is des ned oiwei leicht,

daß ma des Publikum erreicht.

Ned imma gfoit, wos oana schreibt,

liegt oft am Gschmack und an da Zeit.

Grod manchmoi - find i - waar des schod,

wenn oana wos zum Vortrong hod

und er sogt nix, weil sonst am End

a andra eahm „an Deppn“ nennt.

So manches wos zua Zeit passiert,

(mia ham des grod no ned kapiert),

des ham mia gsaat, jetzt schiaßts ins Korn...

Des is aus unsre Sündn worn!

So hod no kaam a Versal gschodt.

Des ghert de Kritika moi gsogt.

Und werd bloß oana deszweng wach,

is jeda Vers a guade Sach!

Ingrid Höft
Januar 2011