Bloß ned eimischn!!!

Ja, de Leit hamm drüba gred...

Bloß nix gnaus des woaß ma ned.

Ja, er mog des Bia recht gern...

und schlogt d' Frau, des kon ma hern.

Naa, do misch ma uns ned ei!

Mia hoin do koa Polizei...

Mei - des geht uns aa nix o,

wos der macht, der guade Mo.

Solang der uns freindlich griaßt,

am Balkon de Bleame giaßt.

Naa - do kennan mia nix song,

wenn se zwoa moi ned vatrong.

Manchmoi is a bisse laut,

z'meist wenn er des Gschirr zamm haut.

Noch na Stund is des vabei...

Wer hoit do glei Polizei?

Und er hod ja vui Geduid,

wenn er mit seim Hund rum spuit...

Werd dann scho an ihra lieng,

wenn er is mit nixe z' frien.

Mei, sie schaut aa komisch aus,

geht ja kaam moi aus' n Haus,

rennt mit Sonnabruin bloß rumm.

Griaßt aa ned und schaut recht dumm.

Manchmoi heart ma sie aa woan',*

Grund dafia sehng mia zwar koan...

Grod wos wissn d' Nachbarn scho?

Und es geht uns aa nix o!

Letzte Woch hods eahm daschlong!

Heit war d' Leich – wos soi ma song?

Mei, es machat uns nix aus...

Waars ned grod in unsan Haus!


Ingrid Höft
Januar 2011

* weinen





Anlaß für dieses Gedicht war für mich ein Zeitungsbericht über einen Prozess.
Angeklagt eine Frau wegen Todschlag an ihrem Ehemann.
Und die Nachbarn haben wieder einmal weggeschaut.