Tod gsuffa is aa gstorm

                  Gnennt hams eahm den scheena Peda,               

z' Erding hod den kennt fast jeda.

In da Stodt sei liabsta Fleck

war der Wirt bei eahm ums Eck.

Hod sei Muadda drangsaliert,

wenns ned glei so hod parriert.

Gheirat hod er dann do gschwind,

hod vazajht, bloß zwengs an Kind,

hätt er gmacht, mit Absicht grod,

zwengs da Mitgift, wos sie hod.

Daad sie aa no ned lang kenna

und aa zwengs dem Gejd bloß nemma.

Auf da Hochzeit fangt er glei

o, mit seina Saufarei.

Host eahm grod beim Wirt no troffa,

d' Mitgift war do schnej vasoffa.

Boid do ham dann Leit scho gredt,

er koa Arbat nimma hätt

und sie wüßtn aa ganz gwieß,

daß sei Frau eahm obghaut is.

Seitdem sitzt er in da Friah,

jedn Dog scho mit seim Bia,

grod am Greanamarkt no rum

bringt se mit' n Saufa um.

Hoaßt bloß no da bsuffa Peda

z' Erding kennt den jetzt a jeda.

Ned moi fufzge is er gwen,

do hod d' Leber nimma meng.

Letzte Woch is er jetzt gstorm...

Gestan is er eingrom worn.

Ingrid Höft
02/2011