UFO (2)

 
I schau auf  d`Nocht in Himme nauf:
De Sterndal leichtn so wia Aung…
Mia wer(d)n  beobacht ! - `S regt mi auf:
Wer mecht uns do in d`Suppn schaung?
 
I sitz no lang im Gartn – und
bin bei meim  viertn Weißbier. – Do
sehg  i – und hob zur Angst an Grund;
a  UFO kimmt in Gartn  ro !
 
Es staubt ganz schee, dann kemma zwoa
ganz greane Manndln… – Oana trogt
so an Translator – ziemli kloa:
„Schö´n Tag!  Wo sind wir?“ - hat a gsogt.
 
Hockt`s  Eich nur her, megt`s  a Marenn*?
Zwoa  Weißbier hätt  i no für Eich,
an Speck… Seid´s zaudürr!  Wia i kenn,
habts Hunga? -  Seid`s  ja doudnbleich!
 
Doch da Translator, der hat des -
mei Boarisch – ned gscheid übasetzt…
Ham gmoant, i waar eahna iatz bes !
San blitzschnej wieda eini gwetzt
 
ins UFO. – Wia da Blitz davo !
„Hey Paule“,  rüttlt mi mei Wei,
„Kimm doch ins Haus!“ – „Wia - wos? - A so!
I muaß woi eigschlaffa grod sei“…
 
* Marende: Brotzeit                                                P.U.  15.03.11