A scheena Dog zum Fentaputzn!

Wenn i so aus mein Fensta schau,

und d' Sonna lacht, da Himme blau,

do juckts mi manchmoi in de Finga

do mecht i s' Haus in Ordnung bringa.

Ja, und des muaß i heit glei nutzn,

am bestn no min Fensta putzn.

De kennan 's Putzn wirklich braucha,

san schee voj Dreck, grod drin vom Raucha...

I hoff, do kimmt ma koana quer

und hoj scho moi des Putzzeig her.

Im Keller suach i d' Loata no,

kimm besser dann zum putzn dro.

Bin auf da Loata no ned drom,

do leit des bläde Telefon.

Do geh i dann hoit schnej no hi,

es kannt ja wichtig sei fia mi...

Mei Tochta dro, moint gwieß host Zeit,

sie hätt nix ghert aa Ewigkeit.

Ja, wias ma geht und ob i gsund

und jammad dann a ganze Stund...

I her ihr zua und hoit des Mei,

ois Mudda konnst do ned so sei.

Mei Fensta laffan ned davo,

de putzn, kon i oiwei no.

Schee langsam gspiar i scho mein Mong

und kannt woas z' Essn jetzt vatrong.

Es geht ja glei auf middog zua

und Zeit zum putzn bleibt no gnua.

Da Kühlschrank leer, waar bessa glei,

i gang in Stodt no vorher nei,

aa Zigarettn gengan aus,

des hejft jetzt nix, erst muaß i naus.

Und d' Sonna scheint, da Himme blau,

do nimm i 's Hoamgeh ned so gnau.

Ja, so an Dog den muaß ma nutzn,

warum denn glei zum Fenstaputzn?!

Ingrid Höft
03/ 2011