Kä Woihnachtsstimmung

Vorderpfälzische Mundart

Jetzt isch´se vorbei die Woihnachtszeit.

Wieder hämér Kerzelcher o´gesteckt.
E Zeit, die Erinnerunge weckt
on die Zeit, wu mir Kinner waren - so klä -
ach, war do en Sunndachowend im Adent so schä.

Ihr Kinner un Leit,
wie hot sich geännert die Zeit.

Heit brennen die Kerze, während om Fernseh de Tatort laaft,
mir essen Gebäcks, vum Bäcker gekaaft.
Frieher, war´mer um de Disch rum gsesse,
hän Niss, Äppel un Mondelkern gesse.
Die Mudder, de Vadder, mir Kinner hän Woihnachtslieder gsunge
des hot net immer schä geklunge
awer isch män, ich hätts heit noch im Ohr
viel schäner, als jeder bekonnt Chor.
Ich män a, ich det´s heit noch riesche,
wie uff de Ofeplatt die Äppel zische.
Gebollert hot ´s in dem Ofe drin
Bilder on die Deck g´schmisse durch de Ofering.
De Duft vun Tonne, Äppel,
Gebäck isch durchs gonze Haus gezoche
es hot so rischtisch woihnachtlich geroche.

Un jetzert do werd mer klar,
daß es des wohl war,
warum ich in de letschte Johre so verdrießt
die Woihnachtsstimmung hab vermißt.