Wos wichti is...

Wia de Fischal unter Wassa
bussln? – Mei, is ma gleich…
Hamma in da Schuj  ned glernt und
wüsst  i`s,  waar i aa ned reich…
 
Woaßt denn, wia vej Sternal stehngan
in da Nacht am Himmeszejt?
Lass des Nochdenga, mei Schatzl –
des zum Wissen, bringt koa Gejd…
 
Oisse braucht da Mensch ned wissn.
Wichti  is, dass mia uns megn
und ganz liab ham und vastehngan,
ob bei Sunnschein oder Regn !
 
Bussln dean ma liaba sejba…
D`Sterndln schaun uns olle zua
und da Mond – der sogt nix weida…
Auf geht´s; Frühlingsnacht is`s, Bua !
 
                                                               P.U.