Ingrid Höft
Ramma da ma!
Mei Speicha miaßat zamgrammt wern...
De Arbat! Naa - i machs ned gern.
Do drom schaut's aus, es is zum Grausn,
ois daan de Hottndottn hausn.
Seit Jahr und Dog, schmeiß i oiss nei,
do wern aa gwieß scho d' Mais drin sei!
Do waars des Gscheida, i machs heit,
weil's renga duad, do hät i Zeit.
I hob de Diar no ned ganz auf,
do foit ma's erste Drumm scho nauf:
A Koffa is und zum Vadruß
do geht glei auf no da Vaschluß!
Dann fliagt da Koffa üba d' Staffe*
und wos so drin is, lauta Graffe*,
oi Dood und Deife foit do raus,
vastraad se schee im Treppnhaus...
A handvoi Bleame von da Duit*
a Ziach* mit dera koana spuit
und Postkartn mit liabe Griaß,
oa Bettschuah gega koide Fiaß.
Und schee vapackt in a oids Gwand
no Bleamevasn ollahand.
Des Aufhem waar des gwieß ned wert
hät oiss scho lang zum Sperrmüll ghert.
I frog mi wos i doa jetz soi,
vom Speicha hob i d' Nosn voi...
Werd wieda renga, in Gotts Nam
dann ramm i aa do drom moi zam.
Fia heit do werds des Beste sei
i schmeiß des oiss in Tonna – glei -
und putz dawei bloß, auf den Schreck,
im Treppnhaus den Saustoi weg.
Es is bläd glaffa, in dem Foi!
Drum werd i glei beim nächstn Moi,
soit mi da Arbeitsgeist olacha,
um den an großn Bogn macha!
Ingrid Höft
Mai 2011
Staffe = Stufen, Graffe = Gerümpel, Duit = Frühlingsfest, Ziach = Ziehharmonika
Die Rechte und die Verantwortlichkeit für diesen Beitrag liegen beim Autor (Ingrid Höft).
Der Beitrag wurde von Ingrid Höft auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 13.05.2011.
- Infos zum Urheberrecht / Haftungsausschluss (Disclaimer).