A Draam vom Gartn

Ja - des Friahjahr waar so schee,
miaßt i ned in Gartn geh.
Doglang werk i dann wia dumm
grod no in mein Gartn rum
und es geht koa End ned her,
langsam foit aa d' Arbat schwer.
Und herin bleibt d' Arbat lieng,
weil i bloß no draußn bin.
Ja, an Gärtna hätt i gern,
jednfoiß muaß andas wern,
weil sonst fang i 's Spinna o
draam scho jede Nacht davo.
Neili bin i bei da Nacht
von an Albdraam auf scho gwacht.
Hod ma draamt, hätt auße gschaut
hätt fast meine Aung ned traut,
war do Oana grod dabei
betoniert den Gartn ei.
Und der lacht no recht vareckt,
hod ma aa no d' Zung rausgstreckt!
Sogt zua mia, des waar scho recht
daß i des ja aa so mecht...
Und er streicht den aa no grea*,
hätt damit ko Arbat mehr.
Ja, do hob i vielleicht gschwitzt
hob mi glei im Bett aufgsitzt.
Ja, der waar ja no da Scheena!
So weit laß i des ned kemma,
liaba arbat i mi krumm,
oda ziahg ganz einfach um.


Ingrid Höft
Mai 2011


* grea = grün