A Dog aus ´m Lem von an Rentna...

Vormiddog hintan Haus mein Gartn ausgrost*,

hod ma grod so richtig a Freid gmacht,

dann fangts blädaweis do as Renga o.

Aba weil ma den Reng ja schee langsam wieda

amoi braucha kennan, hob i mi hoid einfach,

dawei und weil ma mei Buckl aa scho langsam

weh do hod, auf mei Kanapee hi glegt und beim

offana Fensta da Wejt beim Renga zua gschaut.

 
Do leit doch tatsächlich mei bläds Telefon,

bin ned aufgstandn, obwoi, neigierig waar

i scho gwen, wer mi do am helliachtn Dog

bei dem Sauwedda orufa mecht.

 
Hobs aba dann bleim lassn.

Schod jetz loßt ma des scho an ganzn Dog

koa Ruah mehr, weil i ned woaß, wer wos,

warum, von mia woin hät.

Ingrid Höft
Mai 2011

 * ausgrost = Unkraut jäten