Mei Dahoam...

Bin geborn im kloana Haisl
ganz aus Hoiz, im Dörfl drunt,
des da Ur-Großvadda baut hat,
dass er endli heira´n  kunnt…
 
`shat  da Opa dann moi umbaut,
und a weng modernisiert…
Ganz aus Hoiz is aba scho bliem,
weil des so guad isoliert!
 
Vui, vui äjda wia des Haisl
steht da Ahorn, do hiebei.
leicht im Hirgst so schee und goidn,
- ohne den mecht i ned sei !

Und im Grand*  danebm - ois Kloana -
hob i bodt an Sommadog...
Gsund, sei Wassa - mecht i moana -
dass i`s  nimma missn mog.

Winters hat des Hoizhaus kracht vor
Käitn und vom Schnee sein Gwicht,
metahoch war der zum ramma,
drobm vom Dachl, dass`s  ned bricht…
 
Iatz ghearts mir, des oide Haisl
und i denk a diamoi** dro,
wia i  unta´m  Baam ois Junga
oft mei Deandl busslt ho…
 
                                                      P.U.  11.08.11
* Brunnenfassung
** gelegentlich, das eine oder andere Mal