Oiss hoib so wuid !

Wannst moanst, du bist moi ned guad drauf
und dei Familie regt di auf,
de Kinda nervn di scho recht
und, dass dei Frau di nimma mecht…
 
D Kollegn san aa gega di,
und morng, do schmeisst glei oisse hi…
Im Darm, moanst, hast ja eh an Krebs,
im Hirn sitzt gwieß aa irgnd ebbs…
 
Dahoam im Bett hast di blamiert:
Dei „Kloana“ nimma funktioniert…
I woaß, do hejft – ja, glaab ma`s gwieß –
a Bsuach im Kranknhaus… - Do is
 
(des werd di ganz bestimmt kuriern),
vui schlimma oiss. Des muaßt kapiern !
Auf Intensiv – do schau moi nei,
dann lasst des „Hypochondern“ sei
 
und zfriedn mit dir kimmst wieda raus
und merkst: bei dir drinna im Haus
is oiss OK – oiss hoib so wuid
und mit de Kinda hast Geduid…
 
Es san bloß Blähunga – bestimmt,
dei Kopfweh vo sechs Hoibe kimmt
und ohne Stress – do hast mein Eid –
spurt aa dei „Kloana“ wieda gscheid !
 
(;-))                                                     P.U.  22.08.11