Es geht um d Wurscht

(autobiografisch) 
 
Am Rastplotz, bei da Wandarung,     
do ziahg i ausm Rucksock glei
a Wurscht, a Brot, a Büchsn Bier…
Des zischt! – I fühl mi wieda jung -
des Lebm, des kannt ned scheena sei…
 
A Hund hockt si zu uns und schaut    
da Wurscht noch, owe bis in´n  Mong*…
I ess de Wurscht mitsamt da Haut.
Da Hund, der bettlt, er sogt mir:    
Geh, gib ma hoit wos, geiz´ga Krong** !
 
I schmeiß a Stückl Brot eahm hi –
des mog a ned – i woaß genau,
er mecht a Wurscht – ja, Sakradie!
De teil  i  aba mit da Frau…
 
Dann samma fertig und da Hund
der hebt an Hax – bieslt doch glatt
mein Rucksock o… – I kenn den Grund:
Der duad ma des mit Fleiß – akrat !
 
Sei Blick sogt: „Sehgst, des hast davo-
woaßt eh, dass Geiz a Todsünd ist,
Drum bieslt  i  dein Rucksock o,
damit´s D des jatz nia mehr vagisst !
 
*Magen       * Kragen       P.U.  17.10.11