Ingrid Höft
Weihnachtsgrüße
De Not mim Weihnachtsversal
Oh mei, oh mei - da Weihnachtsgruaß!
A Versal is do fast a „Muaß“
Bloß heia ja, i sogs ned gern
do werd do draus, glab i, nix wern.
Am Buidl - naa do daad's ned lieng,
des is recht schee, do waar i z'frien.
Grod's Versalschreim, des geht ned recht:
I bring nix zam, aa wenn i mecht!
Des Versal schreim ois Zeitvatreib,
des macht ma ja an Haufa Freid,
bloß brauch i oans, na kon's passiern
i hob grod Lecha drin im Hirn.
Des Weda is ja aa ned grod,
daß ma a Weihnachtsstimmung hod
und geh i dann in Stodt moi nei,
daschlong mi d' Weihnachtsliachta glei.
Und „Merry Christmas, Santa Claus“...
So plärrts aus jedn Ladn raus.
Do herst bloß no amerikanisch
i werd davo scho langsam narrisch.
De staade Zeit is lang passe
des Remmidemmi is heit schee
bloß das mi des ned inspiriert
zum Versalschreim - i hobs probiert.
Drum werd i heia bloß schee griaßn
auf's Versal werd's no wartn miaßn.
Ingrid Höft
Weihnachten 2011
Die Rechte und die Verantwortlichkeit für diesen Beitrag liegen beim Autor (Ingrid Höft).
Der Beitrag wurde von Ingrid Höft auf e-Stories.de eingesendet.
Die Betreiber von e-Stories.de übernehmen keine Haftung für den Beitrag oder vom Autoren verlinkte Inhalte.
Veröffentlicht auf e-Stories.de am 19.12.2011.
- Infos zum Urheberrecht / Haftungsausschluss (Disclaimer).